Suministro defisiente di koriente

Lo siguiente ta nos puntonan di enfoke i posibel solushon.
MANEHO:
1. Kual ta e maneho di energia vigente aktualmente? E maneho di energia Gobièrnu a inkluí esaki den su programa di gobernashon? Kon pueblo por haña un kopia di esaki?
2. Kual ta e kriterio ku a keda implementá pa loke ta regardá e zonifikashon di barionan den kual regularmente ta kita koriente (sistema di schakel) pa falta di sufisiente kapasidat?
3. Kon a bai ku e plan 2020? A implementá tur e aspektonan importante di e plan aki? Kual nan ta i kuantu tabata e invershonnan?
4. Kiko e plan 2030 ta inkluí? Kant e invershon total ta? Ki benefisio e tin pa komunidat?
5. Dikon e maneho di Aqualectra/ Marubeni i Mitsubishi no a funshoná? Kiko a bai robes i kon a koregí esaki?
6. Ki dia gobièrnu, ku mester salvaguardá interesnan di komunidat ta laga hasi un investigashon den Aqualectra i toets e “best utility practice” pa kalkulá e kapasidat konfiabel i nesesario?
7. Dia ku a eliminá e agrekonan na Mundu Nobo, kiko esei a nifiká pa suministro di koriente i reserva di koriente? Kiko nan a a trese na benefisio finansiero pa Aqualectra?
8. Si resultá despues di e investigashon den e kompania ku tabata tin mal maneho ku a perhudiká Aqualectra i komunidat, kual ta e medidanan ku Gobièrnu lo tuma kontra di esnan ku ta responsabel?
9. Ki dia komunidat por haña bista den e kuentanan anual for di aña 2010?

ASPEKTO HURÍDIKO:
10. Kon ta bai atendé i resolvé e problema hurídiko ku tin entre di CRU, Refineria di Kòrsou i Aqualectra? Komunidat tin kontrato ku Aqualectra pa suministro di koriente i no ku e otro entidatnan. Kual desbentaha esaki tin pa komunidat miéntras ku e problema ta perdura?
11. Ki ora Aqualectra ta “accountable” pa dañonan hasí na propiedat di hende i ki ora ta paga daño? Tin un lista ku ta regarda e tarifa ku Aqualectra ta paga pa dañonan hasi?

ASPEKTO TÉKNIKO:
12. E turbinanan ku tin aktualmente kuantu aña mas nan por funshoná optimal i kuantu mester keda remplasá dentro di poko? Kant e invershon rekerí ta i pa ki tempu?
13. Aqualectra ta kontrolá su ret di koriente? Si ta afirmativo tin un plan ku komunidat por haña bista den dje?
14. Kant kapasidat total (inkluyendo reserva) Aqualectra mester pa garantisá suministro stabil i frekuente den tur bario na Kòrsou? Kant e ta aktualmente?

KOMUNIKASHON:
15. Kon ta bai resolvé e problema na e departamento di storing 08000-135 kaminda ku nunka ta kontesta e telefòn ora tin storing.
16. Gerensia di Aqualectra su komunikashon ku komunidat ta defisiente pa loke ta regarda situashon delikado di koriente i awa. Kon ta bai mehora esaki? Nos NO ta referí na relashonista públiko sino espesífikamente na miembronan di gerensia.

KONSEHO:
17. Kiko BTP&U a konsehá gobièrnu riba e situashon di suministro defisiente di koriente di Aqualectra? Esaki ta tuma lugá riba un base frekuente? Kiko Gobièrnu a hasi ku e konsehonan?
18. Kual ta e tarea i responsabilidat di e komisariado di Aqualectra? Nan ta duna relato na gobièrnu riba un base regular? Si esaki no tuma lugá Gobièrnu komo akshonista mayoritario ta insistí riba e partikularidat aki?

KONSEKUENSIA:
19. Kual impakto i konsekuensia e defisiensia di koriente tabata tin riba invershonnan di eksterior plùs lokal i tambe ekonomia di Kòrsou? Por kuantifiká esaki ku sifra?

POSIBEL SOLUSHON:
20. Tin un plan pa hasi mas uso di energia natural? Si ta afirmativo kual ta e plan i ki dia ta implement'é?
21. Tin un plan riba término kòrtiku pa resolvé e problema di suministro di koriente? Si ta afirmativo kual esaki ta? Aparentemente Refineria di Kòrsou tin un solushon rápido pa krea reserva di koriente na Kòrsou. Ki dia ta implementá esaki?
22. Pa ki fecha komunidat di Kòrsou ta keda garantisá di suministro frekuente, stabil i duradero di koriente?

SUGERENSIA:
Nos ta urgi Gobièrnu pa instalá un entidat di profeshonalnan ku NO ta konsistí di aliadonan di partidonan polítiko pa konsehá i kontrolá gerensia di Aqualectra (modelo CFT) i ku ta raportá regularmente na Gobièrnu.

KONKLUSHON:
Nos ta gradisí boso pa e diligensia pa traha ku seriedat i rapides riba e puntonan ariba i ta keda pendiente pa kontesta konvisente riba kada pregunta. E situashon prekario di koriente na Kòrsou simplemente NO por kontinuá i komunidat ta meresé mehor i no ta tolerá e situashon aki mas. E ta un indikashon kla ku no tin rèspèt di parti di Aqualectra pa derecho di su klientenan (inaseptabel) i tin sierto aspekto ku mester di atenshon urgente. E kliente ku ta paga tin tur derecho di risibí riba un base regular koriente stabil i duradero. Gobièrnu komo akshonista mayoritario mester intervení den e situashon aktual pa trese solushon rápido i duradero pa e komunidat, tumando na kuenta ku Gobièrnu su deber ta di pèrkurá pa e bienestar general.

Nos tin informashon ku ta bai tin un reunion di komishon sentral riba e aspekto aki pa kual nos ta warda riba un invitashon pa nos organisashon sivil por ta presente.

Atentamente,

Phyllis P. Hernandez Ethseliene R. de Windt
Fundadó, lider i bosero miembro enkargá ku sekretariado
OPAKD OPAKD
Telefòn +5999-5124477
Email: opakd2017@gmail.com

E akshon aki ta keda sostené pa Funsashon pa Konsumidó i Defensor di Pueblo.